١٥‏/١١‏/٢٠٠٧

خلاص هتجند

جزء من اغنيه

انا جالي

جواب استدعا ع الهايكستب بسرعه من بكره الصبح هطيير كان نفسي اخد اعفا

و طلعت انا فاقد دفعه و قالولي مليش تاجيل

و دخلت الكشف الطبي وقالولي الصحه تمام وهتخدم لسه معانا لسنيين و سنيين قدام

و حلقت شعري زيرو

و لسبت البدله الميري مش عارف شكلي اتغير و كاني واحد غيري

من بعد ما قلت دي مده اقضيها يا واد و تفوت

الجيش ظبطلي حياتي و حقيقي بقيت مظبووط


خلاص اترشحت ظابط يادى الارف



بجد من اول ما اترشحت ظابط ولقيت نفسى ممكن ادخل الجيش

لقيت نفسى زعلان

اعدت افكر



هو ليه الواحد زعلان كده بجد



المفروض ان البلد (مصر )ليه حق على



زى ما علمتنى وربتنى وكبرتنى محتاجه منى اوفى حقها



بس اعدت افكر واقول لنفسى وهو فين التعليم والتربيه دى اللى اخدتها من مصر بجد

دانا طول عمرى اسمع التعليم مجانا وكان ابويه بيدفع لى كل شهر مثلا فى الثانويه العامه 250جنيه

طيب ربتنى علي اية مصر على السلبيه والتزوير والبلطجه والسرقه والرشوة

دانا مش عارف هشتغل ازاى وهتجوز امتى

بس بجد محتار اووووى نفسى لو دخلت الجيش ادخل وانا مرتاح

بجد مش عارف انا كده ظالم نفسى ولا ظالم مصر



رغم كل ده

بحبك يا مصر

هناك ٢١ تعليقًا:

دكتور حر يقول...

بالسلامه يا ريس

والله كان شعرك حلو

ربنا معاك
وحب مصر يا خويا

Unknown يقول...

سلام عليكم ورحمتة الله وبركاتة
اولا
مدونتك حلوة وكلها حاجات عائلية وكلام عائلي
شكرا علي زيارتك ليا وياريت تتكرر وانت في الجيش كدا تبعتلي كومنت علي الماشي
بس بيقولو ان الترشيح مش معناه القبول يعني ممكن تتقبل او لا
والله اعلم
بس اسكندرية هتضلم من غيرك
انا رديت علي كومنتك ويارب ردي ينال اعجابك
ولما شوفت صورتك
قولت طبعا بلا تيم بلا بتاع
بس وانت صغير طبعا:)
الجيش تاديب واصلاح
ربنا معاك ويزرقك بخدمة جامدة صاعة ولا حاجة
يلا سلامممم
مني

البيروني يقول...

سلام ياددفعة
بس تقلهم ان انت سمك كونان عشان ميخوتكشي في المخابرات وبدل ما تبقى سنة و لا تلاتة تبقى تأبيدة
و كله بيعدي

صانعة الحرية يقول...

السلام عليكم
الشعر جميل ما شاء الله
ويلا كلها 3 سنين هاانت
وربنا يجعله فى ميزان حسنات حضرتك

mohammed alsha3r يقول...

محمد

تروح الجيش وترجع لنا بالسلامه

انصحك تسمع شريط شيخنا

الشيخ وجدى

وانت هتقضى الجيش دا حاجه تانيه خالص

تحيااااااااتى ليك


ويااااااااااارب ما أخش الجيش ياجدعان

الكل يقول أمين

هههههههههههههه

سلاموز ياحبى

غير معرف يقول...

محمد

تعرف حيرتك دي مش نابعة منك

انت عايش وسط مجتمع بيكره الجيش

الي بياخد اعفا منه كانه حصل علي الدكتوراة

والي بيلبس كان مات له ميت


عشان كدة انت محتار مش عارف تفرح ولاتزعل

انا بقولك بايدك تفرح وتخليهم اجمل سنين العمر

الجيش لو وحش بسببنا

ولو عاوزه يبقي حلو هيكون بايدك

بس خليها علي الله

وزي ما انت قلت

بحبك يامصر

برة الجيش او جوة الجيش اثبتلها انك

بتحبها

فزلوكة يقول...

يعنى بعد الكلام الرومانتيك الفظيع ده عن مصر
كان لازم نقفل بنهاية بنحبك يامصر
أعتقد إن زعلك عشان إنت رايح على حاجة جديدة ومجهولة بالنسةلك
وهتسيب حياة إتعودت عليها وفرحان فيها
بس المشكلة الأساسية هى التدوين ......
هتعمل فيه إيه؟؟؟؟؟؟؟؟؟؟؟؟؟
عموما ربنا يوفقك
ويحببك فى الجيش
وعلى فكرة الهايكستب وعن تجربةمكان...
حلووووووووووووووووووووو
وسلام
زهراء

محمد على ..هي كده يقول...

دكتور حر
........

شكرااا على مرورك

بس مش ححلق شعرى ..بالعند فيك

محمد على ..هي كده يقول...

My Hope$
........

اولا شكر على مرورك

وعلى كلامك الجميل ده

صح الترشيح مش معناه انى داخلت خالص الجيش

بس للاسف بنسبه 50فى الميه

محمد على ..هي كده يقول...

البيروني
.......

احنا مش اتفقنا مش هاوزين فضايح ولا اية

ع العموم شكرا لزيارتك

محمد على ..هي كده يقول...

صانعة الحرية

...........
على فكرة ده مش شعرى ده اغنيه لمطرب

اسمه كريم ابوزيد

محمد على ..هي كده يقول...

mohammed alsha3r
.................

والله سمعته سلوك المسلم الملتزم فى الجيش

جزاك الله خيرا على النصيحه

محمد على ..هي كده يقول...

بنت الاسلام
.........
عندك حق فى كل كلامك

جزاكى الله خيرااا كلمات حماستنى كتير

micheal يقول...

ربنا معاك في هذه التجربه الجديده
تحياتي و تمنياتي بالتوفيق

فرنسا هانم يقول...

مصر مش الحراميه ولا البلطجيه
مصر انا وانت والناش الطيبه والنيل
اما التنيين دول
غرباء
ثابت مكانك

Abdelrahman Shalaby يقول...

محمد.. طالما حاتروح مكان فيه ربنا ماتزعلش
وطالما رزقك على الله ما تقلقش
وطالما الأقدار بأيد الله ولا تشغل بالك

واحد بيحبك وبيحبلك الخير وعايزلك الخير ..،،الله
أوعى تقلق..وخليك سعيد ..وشمر أيدك أنت داخل على أحلى أيام حياتك..لو أنت عايز.

أحمد عبد الفتاح يقول...

بص بقه مدام هتدخل الجيش يبقي لازم تقول نشيد الجنود البعاليص
هو سهل قوي
بيقول
سهلبيسة سهلبيسة هلا هلا عالبعليصة

ا بـن عــمــر يقول...

جزاكم الله خيرا على المرور
كنت
هقول بحبك يامصر
بس ترددت
لانى لم اجد منها كنظام
وحكومه
وكثير من الشعب
ما يجعلنى أقول ذلك
ولكن نحبها
لانها كانت ومازالت فيها شباب
يرفعون راية الحق
ويدعون اليها

زُمُرده يقول...

السلام عليكم
مدونه جميله جدا
حسستني انك اخويا واننا في البيت
ويا حبايبنا

بلد العجايب مصر
نفسنا الخير يعم فيها والفساد يرحل ويسيبها
بس فكر المجتمع وظروف الحياه هي اللي خلتك في الوضع ده
بمعنى ..تخيل لو كنت هتروح الجيش وعارف انك اول ما تخلص هتشتغل وبمرتب محترم وهتقدر تتجوز في وقت قريب.....هتكره الجيش؟؟ وخدمة امك مصر ووطنك؟؟
أكيد ...لألألألأ
بس لأن كل شاب بيبص هدخل الجيش سنه او تلاته وبعدها لسه هبدأمن الصفر ويمكن من تحته ويمكن يطر يسيب شغل لقاه بطلوع الروح ويقول:
هحب امتى ؟؟؟و ابني حياتي امتى؟؟ وهتجوز امتى؟؟وهلحق اربي اولادي ؟؟
وهربيهم ازاي ؟؟المستوى اللي هيعيشوا فيه ؟؟

ربنا يصبرك ويعينك
ولو لبست ادخل بنية..علشان بلدي واسلامي هدخل وانفع امتي واهلي ووطني
واولادي وحبايبي وارفع اسم الإسلام واكون جند ربي في الأرض

ساعتها هيعدي الجيش هوااا وتاخد في كل لحظه ثواب والعداد يشتغل
ولما تخلص تلاقي ربك فاكرك وكل الأبواب تتفتح
تعرف كان نفسي ادخل الجيش جدا....واقول معملوش جيش للبنات ليه؟؟
ربنا معاك ويوفقك وابقى طمنا

سلام

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته
بقى اول زيارة لي عندك
تكون في الموضوع ده
عموماً يادفعة ان شاء الله نحصلوك السنو الجاية
وعاوزينك ترفع راسنا وتحارب اعداء الوطن
واوعى حد يقولك
((احنا بتوع الاتوبيس ياخونا))
هههههههههههههههههههههههههههههههه

ahmed mefrh يقول...

مش عارف اقولك ايه
بس الجيش من الامور التى بها عراقل على طريق الانسان اما انه يخرج منها افضل من ما كان عليه او يخرج منها اقل مما هو فيه
و على العموم اخى انتا حتستفيد فى الجيش استفاده كبيره جدا

تحياتى اليك و مع الف سلامه
ابو مفراح